Pinakamahusay na Direksyon, Pinakamahusay na Cinematography

20:23 | Narrative

Logline: Sa isang relihiyoso at mahigpit na tahanan, isang dalaga ang napipilitang mamuhay sa pagitan ng pagsunod at pagtatago. Ngunit nang mabunyag ang kaniyang lihim, kailangan niyang pumili kung mananatili sa isang bahay na hindi siya tanggap o lalaya—kahit ang kapalit nito ay ang paglayo sa sariling ina.

Synopsis: Totoo nga na ang bawat taong nilalang sa mundo ay may itinatagong lihim. Isa na rito si Misa, ang dalagang lumaki sa loob ng relihiyoso at mahigpit na tahanan kung saan ang pagsunod ang sukatan ng pagmamahal. Sa bawat pag-usal ng rosaryo kasama ang kaniyang inang si Beth, mas lalo niyang nararamdaman ang bigat ng mga salitang hindi niya mabanggit. Sa likod ng tahimik na pagsunod ay isang pusong may sariling tinig—isang katotohanang matagal na niyang kinikimkim. Sa isang maliit na laundry shop ng kaniyang tiyahing si Tita Baby, nagagawa niyang sabihin lahat. Sa bawat labadang dumarating at mabangong damit na ibinabalik, tila hindi natatakot si Misa na iparamdam at ipakita ang sarili—kahit pa ang mga bagay na karaniwang naitatago ng puso niya sa mundo. Ngunit hindi lahat ng lihim ay naikukubli.